唔少上市公司鍾意搵會計師、律師等專業人士做獨立非執董，希望利用佢哋嘅專業幫小股東睇住公司，如果佢哋屬於行內知名人士，仲可以順手幫忙省靚公司招牌，華華新近發現，教授都越來越受上市公司歡迎咁喎。
好似廁所馬桶與瓷盆生產商航標控股（1190），最近就搵來恒生管理學院商學院院長兼金融學教授蘇偉文做獨立董事，為期3年，每月有1.8萬元嘅董事酬金。
正在招股嘅盛京銀行（2066），其中一位獨董就係嶺南大學歷史系副教授劉智鵬。
根據聯交所資料，蘇偉文與劉智鵬兩位教授都係首次做上市公司獨董，蘇偉文來自金融系，就算唔識實際公司管理運作，喺理論上都應該幫到手，之但係，劉智鵬係歷史系㗎喎，唔通利用鑑古知今嘅本領睇住呢間銀行？