雨傘運動對香港社會有幾大震撼力？睇睇運動核心人士攻佔網絡就知道！Google公佈今年嘅十大熱爆本地時事人物，其中8人同佔領運動有關，早前已經喺雅虎香港人物搜尋榜排第2嘅學聯秘書長周永康，今次登上榜首，成為網絡紅人。學聯男神岑敖暉排第3，隔住Alexter嘅「電燈膽」係學民女神周庭。
之鋒輸畀偲嫣BB
上過《時代》雜誌封面、喺雅虎人物搜尋稱冠嘅學民召集人黃之鋒，今次只排第5，不敵第4位嘅正義聯盟召集人偲嫣BB。其餘入圍嘅相關人物包括排第7位嘅佔中發起人戴耀廷，運動期間促狼英辭職而被褫奪政協資格嘅田北俊，以及「暗角打鑊」主角曾健超，分別第8同第10位。
至於十大中與雨傘運動無關嘅時事人物，分別有排第6嘅已故「影視大亨」邵逸夫，以及排第9、被狂徒斬至重傷嘅《明報》前總編輯劉進圖。