曼聯𠵱家真係喜氣洋洋，上場聯賽贏埋宿敵利物浦，英超6連勝排喺聯賽第3位。可能見成績好，加埋周中又冇波踢，領隊雲高爾都隻眼開、隻眼閉，由得班球員再搞多個聖誕party。
我求大俠記得曼聯早排先搞過聖誕party，球員帶埋另一半出席，雲高爾亦有到場；但老細同老婆都喺度，點玩得盡興呀，所以隊長朗尼就組織多次聖誕party，星期一晚全男班出征！朗尼呢個搞手做得幾好，包咗3架巴士，先帶班隊友嘆中餐，再去酒吧繼續下場，玩到凌晨兩點。曼聯仲將歡樂送畀小朋友，佢哋星期一晚去玩之前，日頭就到醫院探訪，尹佩斯、迪基亞等個個拎住大袋禮物落車，入到去派禮物畀病童，同佢哋影吓相。
涉行賄助薩拉戈薩護級
不過喺歡樂背後，安達靴里拉應該幾惆悵。事緣西班牙反貪檢察部門懷疑，10/11球季薩拉戈薩對利雲特場波涉造假，當時踢緊薩拉戈薩嘅靴里拉被指涉處理賄款。如果罪成唔止停賽，仲可能要坐監。
呢場係嗰季西甲煞科戰，薩拉戈薩以2:1贏咗利雲特，最終護級成功，但𠵱家當局指，薩軍原來畀咗96.5萬歐元（約935萬港元）利雲特，叫對手放水輸波。當局𠵱家鎖定42人，包括28個球員、教練同埋球會領導層，例如嗰陣嘅薩拉戈薩教頭、𠵱家嘅日本主帥艾古爾，同埋嗰陣踢緊薩軍、現效馬德里體育會嘅中場基比。不過，靴里拉同艾古爾、基比等唔係衰打假波，而係被指幫手行賄利雲特球員。
基比收錢推晒畀主席
報道話，薩拉戈薩將呢筆賄款入落呢班球員、教練嘅戶口之後再拎番出嚟，等球會再畀利雲特球員。基比澄清話自己只係聽球會主席話，佢承認主席當時入咗8.5萬歐元畀佢，但同一日已經畀番主席，佢亦唔清楚呢個安排，「主席話點，我就照住做。」靴里拉亦否認涉及行賄，「我從未而且未來都唔會做任何操縱比賽結果嘅事，如果要傳召我接受聆訊，我樂意出席。」呢次涉事嘅球星仲有當時踢利雲特嘅現史雲斯中場謝法臣蒙迪路。另外，曼聯又有轉會消息，雖然雲高爾話唔買人，但傳緊紅魔下月用900萬鎊收購加拉塔沙雷中場史奈達。
