幾時世界末日？冇電視睇嗰時囉！沙田鄉事會主席莫錦貴噚日喺鄉議局執委會提出臨時動議，要求跟進大圍村電視收得差嘅問題，佢話自4年前長實誠哥嘅樓盤名城落成，村內嘅電視就收得好差，各個數碼台都睇唔到，通訊辦都證實咗，點知名城班業主唔肯讓啲地方出嚟裝轉發器，政府部門、港鐵更闊佬懶理。
連十八鄉鄉事會主席梁福元都有共鳴，話將來啲地契應有附帶條件，若新樓影響村民睇電視，發展商應該照顧番村民基本權益。
村民睇唔到電視，鄉議局都要出頭，真係幾頭痕，尤其鄉議局仲被人追緊數，包括要交十萬計嘅差餉，一陣倫敦個聯絡處又話要追番百萬計使費，主席發叔真係要諗方法開源節流先掂喇。