國際賽剛周日結束，當日連場大戰大家仲回味緊之際，馬會已落力宣傳2015年元旦日沙田日賽，呢日(16日)馬會喺跑馬地馬場舉行「好運1月1賽馬日」記者會，由2012年國際中華小姐冠軍張曦雯做主持，林海峰都有出席，原來佢幫馬會設計咗一系列精品，包括手錶、T恤、衛衣、手提包、手提充電器等，元旦日起向公眾發售，仲會向當日入場人士，送出由佢設計嘅匙扣一個。
三位騎師郭能、何澤堯及楊明綸亦有到場，著上林海峰設計嘅衛衣，同啲產品賣吓廣告。佢哋三個仲玩遊戲，大會要求佢哋在佈景板上18個位置中挑選，如轉出有絲帶馬公仔圖案，就獲贈膠膠哋嘅「銀鑽」馬蹄鐵，個遊戲都好假吓志在開心，似乎騎師們一早知道邊個位置有馬公仔，半造馬一估就仲，唯獨何澤堯好大懵，早被通水但第一次仍估錯，要第二次才轉出馬公仔，不過玩吓啫，唔使咁認真嘅！
剛攞到無綫飛躍進步獎男、女藝人嘅張繼聰及黃翠如，亦成為記者會嘉賓，幫馬會造勢；佢哋並將會喺1月1號當日，化身成為「好運之星」，穿梭沙田馬場同馬迷玩有獎遊戲。翠如BB嘅美貌氣質，向來受宅男歡迎，但呢日佢著到好密實，女神張曦雯樣貌唔差過翠如BB之餘，仲要比翠如年輕9年及高一截，加上曦雯BB呢日大晒白滑長腿，真係冇得輸囉！