【亞視風雲之籌錢奔喪】亞視財困，員工冇糧出，引發無數悲慘的故事，先有俄羅斯繙譯大肚等錢生仔，再有菲律賓亞洲先生季軍狄凱亞，家鄉被超級颱風吹襲致家中水浸籌錢應急，前日對亞視忠心耿耿的藝人黃集鋒，亦因為爺爺過身急需籌錢辦理身後事，終於情緒爆煲在fb和微博自揭瘡疤，上載個人戶口餘額$7.94圖片：「就是為了一口氣，她媽的！也很任性」
自揭戶口洩憤
黃集鋒近日是非纏身，早前被仙樂都指是「鹹豬嘴」，他昨重申自揭戶口餘額是洩憤，更不怕被人取笑，他說：「我唔怕，我唔係窮到去乞錢，人窮有乜嘢怕，最緊要志唔好窮，終有一日我會搵到一筆錢番嚟，畀大家知道我會企番起身。」但事實黃集鋒真是等錢用，他說：「阿爺過咗身，呢度又使咗一筆錢，使咗十幾萬，因為佢要返鄉下土葬嘛！一路辦緊手續，加上公司嘅事，呢輪都搞到自己好心煩，我有向公司反映過，公司話要按規矩辦事，咁我當時聽到有啲唔開心，我𠵱家只不過同公司講將我嘅事情特別處理，佢就話要按規矩，我𠵱家唔係唔依規矩，係佢唔規矩喎！」不過，他提到今年跟亞視約滿，又表現出不捨之情：「我個心態都係既然喺呢一間公司，我就做到最後一日為止喇。」
亞姐：鍛煉機會
一班應屆亞姐和亞生昨日在亞視總台試鏡，有「小鞏俐」之稱的落選亞姐吳夢婷才藝出眾，即場表演側手翻和一字馬，對於冇糧出，她說：「是一個鍛煉機會，不理公司怎樣，做好自己每一步。」季軍陳洋鈴聞說黃集鋒戶口剩得$7.94，她深信自己不會這麼可憐，至於亞生林志勇表示自己正職是救生員，只會當ATV工作是業餘活動。
蔡國威和張家瑩昨在亞視拍攝聖誕宣傳片，威仔表示十多年前遇過黃集鋒的情況，他說：「好明白咁樣嘅痛苦，如果能力做到唔介意，自己有事想人接濟自己。」
昨日收到消息指亞視冇糧出但有錢借給員工，亞視公關部證實亞視並冇借錢給員工，據知可能是部份部門主管私人借貸給員工解困。
採訪：溫敏芝
