行會前成員、商交所主席張震遠，拖欠新利控股（現稱青建國際控股）前非執董梁志漢4,733萬元，俾梁入稟高院申請破產單案，一拖年幾，昨晨再審。張震遠人又唔到，連律師都冇到，大家以為佢破產在即，梁嘅律師卻喺庭上話，喺最後一刻同張傾過，可望傾得埋，叫法官等到下晝。到下晝，律師話張顯示咗足夠嘅誠意，可以坐埋再傾吓和解，申請將單案押後三個月。
究竟張震遠做咗乜嘢咁有誠意？律師唔肯講，記者卻發現，張喺下晝搵咗律師到庭，同梁嘅律師喺庭外大堂密斟，之後將一張支票「揚嚟揚去」，又有人提到立法會議員石禮謙嘅大名。
石禮謙講過同張、梁都相熟，唔通張搵咗大嚿石做「白武士」？記者打畀大嚿石求證，佢反問：「你可唔可以唔好求證？人哋啲唔係咁開心嘅事，你當冇問過我好唔好？你當搵我唔到喇！」答得玄但冇否認囉！
單案鐵定唔早於明年3月16日再審。梁嘅律師表明，如果和解唔到，到時就最後一次上庭，換言之唔會再畀機會張震遠㗎喇。