近年大熱嘅迪士尼電影《魔雪奇緣》（Frozen）由幼稚園紅到去中環投資銀行。瑞銀每年聖誕都會為慈善大搞角色扮演派對，《魔雪奇緣》裏面兩個主角，女皇Elsa與公主Anna紅到發紫，今年幼稚園萬聖節派對，幾乎個個細路女都扮佢兩個，搞到瑞銀衍生工具部李靄欣（Anita）同卓素華（Winni）都要嚟個大人版。
瑞銀呢個角色扮演派對上星期五舉行，年過30嘅靚女Anita以潮爆嘅Elsa造型現身，佢同事Winni年輕少少就扮Elsa細妹Anna，佢兩位嘅扮相又靚又神似。瑞銀寫字樓喺中環IFC，佢兩位竟然玩得興起，就咁以呢一身造型走落IFC商場，話行街喎，結果咪即刻吸引路過嘅細路女走埋去集郵囉。
寫字樓大唱《Let it go》
至於佢兩位嘅老闆、即係衍生工具部阿頭于正人（Johnny）亦潮埋一份，點都要扮《魔雪奇緣》其中一個角色，不過，王子就冇佢份，佢扮鍾意陽光與海灘嘅雪人Olaf呀。
Johnny好坦白咁話，其實未睇過呢套戲，佢本來諗住可以扮王子，點知有人以「二打六角色」為由ban咗佢呢個諗法，佢最終選擇扮可愛嘅雪人囉。佢呢套Olaf衫用100蚊人仔喺淘寶淘番嚟，玩一次都仲得嘅。不過，有位未睇過套戲嘅同事竟然問佢，係咪扮雞仔，搞到其他人笑到碌地。
聞說，佢哋當日喺寫字樓播住電影主題曲《Let it go》，呢首歌街知巷聞，有人跟住唱，high爆呀，最衰冇錄影喇。
李華華
mailto:[email protected]