容祖兒前晚（15日）喺灣仔伊利沙伯體育館出席《祈願世界和平2015慈善音樂會》並獻唱《心經》，對於曾是密友嘅何韻詩近月積極參與雨傘運動，唔少市民都形容佢係民間特首，祖兒話：「知佢有呢方面嘅興趣，但𠵱家好少同佢聯絡，知佢喺呢方面好落力。」
「做人有條理」
問祖兒以前同阿詩相處，覺唔覺得佢有治港才能？祖兒即刻話：「係好高深學問，我唔知呀！相處唔同治港。」咁阿詩管工人同助手係咪頭頭是道？祖兒笑住話唔可以相提並論，但就讚阿詩做人好有條理。有記者叫祖兒喺劉德華、周潤發、梁振英同阿詩入面揀個做特首，祖兒就話唔識答！
雖然唔識揀特首，但講到同門師妹兼好友蔡卓妍（阿Sa）幫電影《雛妓》影嘅海報，祖兒用震撼嚟形容，仲話好期待睇Sa嘅精湛演技，又叫大家唔好用睇色情片嘅角度去睇呢部戲。祖兒話：「知道阿Sa拍呢部戲最辛苦係情緒問題，拍嗰時情緒好低落，有少少抑鬱，但𠵱家冇事喇！」另外，公司高層吳雨噚日出席九龍塘啟動禮時，話覺得歌手唔出席頒獎禮係抹煞幕後團隊功勞，問佢睇唔睇好祖兒冧莊「最受歡迎女歌星」？佢話：「希望啦，我哋盡力。」
撰文：馮仁昭