沙田馬場呢朝(16日)11組試閘中，最矚目的試閘勝出馬，應該是第三組1000米草閘的「鑽石巨匠」，這匹姚廐三歲澳洲自購新馬，馬主團體成員包括樂壇天后陳慧琳的老竇陳崇偉；馬兒在港出賽過兩次，分別得第四及第五，表現不過不失，但今課試閘此駒卻像發了癲開竅般，在郭能胯下大步帶放，沿途好輕鬆，末段勁勢毫無減弱，以7個馬位之先，大勝亞軍「帶盈來」一條街返嚟，造出58秒5，係全日5組1000米草閘中，時間最快一組。雖然今組對手實力並非好強，但「鑽石巨匠」嘅速度實在唔講得笑，經過兩場賽事熱身後，相信短期內如再戰，應有機會讓陳崇偉拉頭馬。
除了「鑽石巨匠」，呢日第八組1200米泥閘的「萬事勇」亦有好表現，同樣一放到底，大勝上季澳港盃盟主「城中話題」4馬位，走勢相當矚目，而上仗季內初出心律不正常大敗的蔡廐明星馬「戰利品」，喺呢組沿途居後唔起眼，只跑第7名。