港視（1137）主席王維基（Ricky）嘅網購平台今日正式試業，呢個Ricky自稱係走投無路而迫出來嘅網購平台，總共搵咗333個來自香港、日本、韓國嘅品牌，不過試業階段暫時只係得15間商店畀大家揀，多數係護膚品牌。
港視總共有300個送貨員、120架運輸Van仔，物流總部喺九龍灣。華華就拎到幾張車隊嘅外貌相，見到港視Van仔都係白色車身，仲貼住大大隻HKTV字樣，廣告嘅顏色都幾sharp，喺街道行駛都應該好搶眼。
港視網購嘅賣點係Mall Dollars，客戶每次以信用卡購物之後，賬戶都會獲得相等於消費額3%嘅Mall Dollars，可以喺下次購物當現金使用支付；今次試業一連7日，期間每次有15%回贈，變相即係85折。客戶買滿400蚊就有免費送貨，即日或翌日就會收到訂購貨品，都算幾方便。
Ricky曾經向傳媒講過「可以將整個東京帶來香港」，但係今次搵番嚟呢三百多個商戶，好多品牌都唔算熱門，香港人比較熟識嘅包括歐舒丹、周大福、六福等等。
