民建聯議員嘅英文水平，大家心中有數。繼之前北區區議員藍偉良橫額上寫住嘅「Marry Christmas」（嫁給聖誕），有市民發現，同屬民建聯兼且都係北區區議員嘅王潤強，雖則串啱「Merry」，但之後卻係「Chrismax」（圖）。
錯就要認、打就企定，王潤強回覆本報查詢時直認有錯字；作為中學老師嘅佢他慨嘆：「無論教邊科，（寫錯字）都係唔啱。」佢話呢批慶祝聖誕嘅橫額係同另外3款橫額喺約三周前同時製作，「因為（聖誕橫額）個稿太簡單，冇諗過會出錯」，所以自己喺橫額印成後無再次檢查。雖然係「手民之誤」，但「把關一定係我……錯咗就要虛心受教」。佢已安排拆走橫額，重新設計新一批。