近日震盪市下，防守性強嘅公路股普遍表現唔錯。不過，有單新聞好值得戰友留意，內地有條高速公路，因收費期屆滿唔可以再收錢，但當地官員竟然諗到條絕橋，將條路改個新名又收番錢。咁都得？如果條橋行得通嘅話，成個公路股嘅估值將翻天覆地。
內地高速公路收費期限一般係25年，之後唔可以再收錢。所有公路股嘅估值同現金流，都係按呢個前提來釐定。
由於內地高速公路歷史短，所以市場好少見到，收費期真係屆滿會發生嘅事。
不過，河北石家莊至北京高速公路由於90年代初就通車，按法律規定，今年11月起不可以再收費。當地官員咁係唔甘心，事關如果條路免費，好多收費員要下崗，公路維修又要使錢，所以就巧立名目，話條路要擴闊，改名為新京石高速，12月起再收多22年錢。
河北呢招，第日啲上市公路股能否照抄，暫時未知。但立竿見影效果就係，內地高速公路好難免費，就算法律規定都冇用。
所以公路股唔使擔心第日有越嚟越多嘅其他免費公路來分流，估值自然唔同晒。
李可強