國際賽大戰過後，大家以為一切歸於平淡之際，谷戰專家方嘉柏卻密鑼緊鼓進擊主場。近四次谷戰方廐皆有馬贏，已重拾谷中之王本色，加上近五季國際賽後之谷戰，佢都例贏無斷纜，其中上季同晚兩匹王牌馬「城中話題」及「皇者拍檔」更雙雙有表現，因此今期除非不捧方廐，否則必以王牌在身的「十二門徒」及「贏到爆」為首選。
第六場「十二門徒」季內首戰贏田草直路賽，加分後再跑兩次田草都無功。評分高企方嘉柏遂部署此駒易地求變，務求以新鮮感及谷草較弱對手，激發其潛能以再創佳績，部署似足早前先贏田草，再贏泥地的同廐馬「乖乖寶貝」。
第八場「贏到爆」上季贏田草千六米開齋，今季則在谷草一哩重開勝門，中距離實力毋庸置疑。上仗初跑泥地沿途外叠望空大敗不能作準，今次回師谷草一哩贏馬路程，打王牌擺出搏殺格，有機會與「十二門徒」攜手為方廐起孖。