魚樂無窮:年尾收爐追揸沽策略 - 唐牛

魚樂無窮:年尾收爐追揸沽策略 - 唐牛

臨近年尾假期特別多。唔少人話基金歲晚收爐,成交減少是常識吧。根據路邊社消息,今年基金搵食特別艱難,贏一兩成足以冠絕全行,輸少少已經夠扮代表,輸兩位數反而係新常態,畀着你係基金,你夠唔夠膽收爐等過年?你對唔對得住啲客仔?驚唔驚出年俾人贖回贖到冇得撈?
傳統智慧話畀我哋聽,年底基金window dressing,最愛沽弱買強,一來唔想畀客仔睇到自己揸住啲衰股,二來想靠強股做靚份成績表,所以年底吼實今年強股實冇衰,上周推介嘅四環(460),絕對係基金mark價首選對象,近日拾級而上,重上六字頭不是夢。

置富有望成領匯翻版

油價跌完一關又一關,市場演繹為另類QE,資金驚通縮多過驚通脹,美股因拆倉潮大冧,令10年期債息近日低見2.1厘,高息股有望再次抬頭。房託股置富(778)最新息率五厘,PE 3.7倍,PB 0.75倍,比起龍頭大哥領匯(823)更吸引,最新收購麗港城商場,物業回報率超過四厘,超人肯出手買嘅,好少死錯人,進一步壯大資產規模,未來派息能力又可加強。
再加少少想像力,領匯成功染藍,無論從業務、市值、成績睇,置富皆為下一隻染藍REIT大熱,一日高息持續,防守力皆可保持,逢低吸納準沒錯!

唐牛
https://www.facebook.com/tongcow88