國家主席習近平上台後，由於對外姿勢強硬，A股最威嘅係軍工股。但因涉及國家機密，最核心嘅軍工業務，只有A股先有，喺滬港通之前，香港人冇得炒。
不過，喺A股俾人炒爆嘅成飛集成，重組計劃喺上周六被國防科工局叫停，高位追貨嘅內地股民全部都中晒招。香港人之前冇得玩，反而避過一劫。
呢隻成飛集成，係最威嘅軍工股。大股東中航工業喺5月公佈，要將旗下所有導彈、戰鬥機業務注入，打造成航空工業巨無霸，涉及156億元人民幣。消息公佈後，公司股價至11月停牌前，爆升咗近四倍，個個以為有好嘢。
中航工業屬於國資委旗下，大家都以為，只要國資委同意，交易就可通過。
但原來涉及國防，另一個單位國防科工局都有話事權，最終以造成國防工業壟斷理由，叫停交易。
成飛集成股價昨日跌停，由於冇咗資產注入，肯定仲有排跌。問題就係，呢啲審批程序，以及可能存在嘅政策風險，連內地股民之前都冇人為意，香港人不熟悉軍工政策，更加冇可能知。呢啲軍工股，香港股民都係少掂為妙！
李可強