堆填區噚晚真係好精采，正當大台嗰一面搞緊萬千星輝頒獎禮，我哋《蘋果》大樓都搞咗一個萬千星虧頒獎禮，結果就有啦！頒發獎項如下：
最虧飛躍男演員——飛躍傑
最虧飛躍男演員，梗係要頒畀飛得最遠嗰位。《叛逃》關禮傑係堅，但同飛躍傑仲差一皮。着住迷彩軍衣嘅飛躍傑，孤高眼神散發出哪裏來嘅自信，人生格言係「冇把握嘅，我係唔會做」，莫講話由高樓大廈飛到對面天台，就算要由IFC跳到去ICC，一樣難唔到佢。
只見飛躍傑閉起雙目聚精匯神，突然一個180度轉身，以最騎呢跑姿直奔欄邊，然後一躍而上，成功飛越維多利亞港，再來一個完美落地動作，一氣呵成冇得輸。（飛躍經長時間訓練，切勿模仿）
最虧造型設計——家祥
也許，要觀眾講番《守業者》劇情，相信冇乜人記得，但結局一幕，馬浚偉與楊怡被水浸一幕，應該仲有印象，因為實在太幻海奇情了。話說《守業者》結局當晚，天文台發出黑色暴雨警告，多個地方落雹，而馬浚偉咁橋同楊怡在水浸後分離，情節跟現實巧合到得人驚。
至於為何要頒發最虧造型設計給家祥？事緣馬仔被水浸到上頸，又先後被牌坊及巨木衝擊，但醒目髮型絲毫未被沾濕，依舊齊整，教人嘖嘖稱奇。
最受歡迎新聞從業員——袁High花
袁志偉在的地位同名聲冠絕新聞界，不知幾多人聯署「表揚」他的豐功偉績。當然，他報道新聞的「客觀」和「持平」，亦是令人嘆為觀止。只可惜，最受歡迎新聞從業員獎，最終由袁High花搶走。據說某日High花開大會，質問員工為何慣性利用「懷疑」、「涉嫌」、「疑似」、「相信」等字眼去報道新聞，正所謂多一事不如少一事，惟有將這獎項拱手讓給High花。
最虧專業精神獎——垂死珊
如果看過《點金聖手》的觀眾，都會被徐子珊的演技深深吸引住，她那十年如一日的表情，可以完全勝任任何角色，堪稱百搭。不過最厲害的是，她繼《潛行狙擊》和《神鎗狙擊》之後，再度延續不死神話，有如《喜劇之王》入面嘅尹天仇一樣，死極都死唔去，最虧專業精神獎可謂實至名歸。
最虧新人——阿忍
《沒女大翻身》的新移民阿銀，力竭聲嘶的演繹出走音版《阿銀的夢想》，後又被揭發扮沒女，其實有樓有舖，激起民憤，最虧新人當之無愧。獎項由阿忍代領，發表了一段感人肺腑的致謝辭如下：
「我唔係沒女。我有一個夢想，就係大家唔好歧視大台啲劇好維穩，唔好再歧視大台啲膠劇有穿崩，因為大台都冇歧視過隔離台，乜嘢都冇！拍！過！我有一個夢想，就係有一日大家睇電視，唔理大台定細台，肯畀錢拍劇嘅就有得留低，唔肯畀錢拍，同冇劇拍嘅就out！不分你我，不分大小，人人有電視睇～～」
最虧女主角——愚勁珊
若說余詠珊不是演戲材料，少年你太無知了。雖然珊姐是沒女Meggie同陳志雲的混合體，但無阻其見報率，比好多一線花旦還要高。而她那處變不驚的態度，表裡不一的情感，將一個深藏不露的中女演繹得絲絲入扣，最虧女主角非她莫屬。