有首經典金曲嘅歌詞係「叉燒包，誰愛吃剛出籠的叉燒包……」唔知係咪太過深入民心，稻香（573）行政總裁梁耀進（Eric）透露，稻香喺內地嘅客人，最鍾意食嘅，並唔係山珍海味，而係叉燒包，每個月可以賣出過百萬元叉燒包咁話。
千祈唔好睇少叉燒包，原來行內人要睇一間茶樓嘅點心師傅手勢掂唔掂，首先睇嘅，就係叉燒包好唔好食，事關要蒸到個叉燒餡有汁，皮又夠鬆，係好考功夫。
Eric話，公司最近研究緊增添一啲自動生產包點嘅機器，曾經跟日本廠商討論有冇辦法做到製叉燒包機。點知廠商都抓晒頭話冇計，原來要個包圓碌碌封實唔爆反而容易，要整到好似叉燒包咁，有少少爆開、但又唔漏汁，基本上係冇可能。
咁多請點心師傅咪得囉？Eric大嘆唔係佢哋唔想，而係全行缺人，問題咪又係年輕人唔肯入行囉。