【本報訊】焦慮抑鬱，甚至亂發脾氣，並非女士們專利。中年熟男也會因工作壓力太大，或遇到感情困擾而影響情緒。精神科醫生表示，不少中年男士面對工時長、「跑極都唔夠數」或生意失敗結業而壓力爆煲，隨時出現焦慮驚恐症狀。男士很多時因顧及面子，不向家人或同事傾訴，令精神狀態如一條將拉斷的橡筋。
記者：陳沛冰
精神科專科醫生李德誠表示，以往中年男士即使有情緒問題，很多時也諱疾忌醫。即使被家人強行帶往求診，也不願打開心扉。但隨着近年不少人對焦慮抑鬱問題認知增加，男士們較以往主動求醫，「好多時係發現自己終於頂唔順，覺得真係要搞搞佢，如果唔係連工都返唔到」。
需服藥及調節生活
向他求診的中年男士從事不同行業，「白領藍領、打工仔老闆、開茶餐廳、做玩具設計都有」。打工仔主要承受沉重工作壓力，「長時間工作，做極都做唔完，或者跑極數都meet唔到quota」，特別是臨近年尾，「有人一日三次俾老細WhatsApp提佢未到數」，又要開始做明年工作計劃。有求診者是食肆東主，生意轉差，擔心連租金也無法支付。
李稱，不少求診者患有焦慮症狀，「精神唔好、好多憂慮、緊張心慌、個人放鬆唔到，啲嘢未發生已經驚定先」。有求診者更會情緒不穩，「會突然發好大脾氣，好似以前唔會鬧夥計，就忽然鬧得好甘」。
有壓力爆煲男士甚至出現驚恐症狀，「怕嘈、怕人多、怕塞車，唔可以搭地鐵巴士，驚喺架車入面好逼，又走唔到出嚟，好似會突然間暈低，唔能夠呼吸」。曾有病人因為怕逼，等兩、三班地鐵都不敢上車。除了工作原因，有男士受感情或婚姻問題困擾，如有第三者，壓力太大需求診。
他表示，部份病人需服藥治療，如服食血清素減少焦慮情緒，也要調節生活及思想，如減少不必要應酬，爭取時間休息，減少飲用咖啡及茶。同時，學習放鬆心情，「唔好睇得咁緊張，工作上真係頂唔順，就要留意吓，準備轉工」。部份病人內心知道自己問題所在，較易接受醫生意見；但部份病人思緒混亂，治療時要抽絲剝繭，慢慢分析問題癥結。