香港人養寵物多是貓、狗、鳥或魚，不過年輕一輩接受新事物自有一套，蜥蜴、蛇、大烏龜通通寵愛有加。早年曾養狗的森美近年就轉養豹紋陸龜，貪其外形似足史前動物之餘，又不用花時間陪伴玩樂。
日前森美就帶同飼養兩年的「豹龜」豹仔到爬蟲店臨立的旺角相親，恨飲新抱茶的森美笑說：「以前有養過狗，又有養過象龜，其實佢哋都有好多唔同種類同品種，佢哋隻腳真係好似成隻大笨象咁，後來就因為佢體形越嚟越大，所以就擺咗佢喺元朗一個教會農莊，等佢可以自由走動，因為我哋香港人始終屋企地方唔會太大，對佢哋嚟講其實好慘。」
鍾意睇多過玩
問到何以會轉養豹龜時，他說：「養咗一、兩年，佢哋好似史前動物咁，行動又慢，加上唔使拋波同佢玩，有啲狗仔玩極都唔會完嘅。其實我第一次見呢種龜係喺夏威夷一個動物園，當時已經覺得佢哋好威、好有霸氣，仲知道佢哋可以有5、60年命，咁就好似唔使面對佢哋死嘅傷心咁嘛。」
森美被問到養龜比養其他動物會極少互動時又笑說：「我唔係好鍾意同寵物玩嘅，反而鍾意喺一邊觀察，望住佢哋已經幾開心，養寵物唔一定要玩嘅，望吓佢哋食嘢就好似觀賞原野咁，其實佢哋有時都會叫你，好似同你講嘢咁，唔舒服又會叫。」森美表示要帶豹仔識女仔，店長就即時將鎮店靚女帶出場，與豹仔同屬豹紋陸龜的「靚女」芳齡30，不過豹仔卻縮頭縮尾怕醜，未敢與靚女好好溝通。
豹仔相親失敗
恨飲新抱茶的森美就笑說：「豹仔個衰仔又嫌人肥、又嫌人老，惟有再慢慢搵啦。但係如果有機會任我揀，我真係想養隻老虎，幾犀利呀，仲可以拖住四圍去。或者馬都好，因為我有騎馬，好似人馬合一咁，我又覺得馬有好微妙嘅思想，控制到的話好似同佢結合咗咁，有得養就開心喇。」
採訪：藍文浩
場地：龜蜥大發旺角店
【話你知】豹龜體長達18吋
豹仔身世其實幾巴閉，學名為豹紋陸龜，又名豹龜。豹龜是世界上第四大的陸龜龜種，典型的成龜體長可達到18吋（約460毫米），體重40磅（約18公斤），當日與豹仔相睇失敗的鎮店之寶就飼養近30年，店員更笑指如果牠飲飽水，一個成年人根本抱不起。豹龜是草食性龜類，與其他龜一樣，在受到威脅時，牠們可以收回頭部和腳到自己的殼裏以作防禦之用。
