上周二孫柏文分享過對周末日本大選嘅預測，就係執政嘅自民黨會大勝，但投票率極低，中晒！咁上周二亦建議喺大選前最後個交易日，即上周五加沽日圓。嗰日118.5日圓兌一美元。噚日日圓輕微上升，但我繼續重申由2013年初，87日圓兌1美元時，當時連續用咗好幾篇文，近乎跪喺到求大家做嘅推介，即日圓第一站跌到落148日圓兌1美元，之後再睇200。
安倍挾民意繼續印鈔
今次加沽，係因為執政政府推佢哋嘅印鈔計劃，一定有內部及政府以外叫停嘅壓力。特別睇時序，日圓兌1美元徘徊咗喺100好耐，到日央行萬聖節突襲開始有人先知先覺，但呢個政策一定有人打首相直線媽叉佢。可以想像，政客最終都係打選民授權牌，叫反對嘅人「你咁叻不如選贏我」，所以就急急叫大選。
所以大勝完政府挾民意以控制印鈔機。始終日本政府不但無錢使，最緊要係借開錢畀佢嘅日本國民儲蓄率已是負數。連借都借唔到，故一係將利息抽升吸引外資買國債，一係減政府開支，一係就用振興經濟，要有通脹等藉口去印鈔買國債。
只要成功用溫水煮蛙形式去印，日本國民都老到無力去「佔東」，洩睇住啲老本貶值之忿，所以各位fans，咁辛苦走去度乜A股吖，求其沽日圓都不知清晰簡單幾多。若啲日圓真係咁跌，亞洲貨幣全部都會有下跌壓力，人民幣都係一樣。近年「買人民幣最穩陣」嘅神級地位，有如2007年前買滙控（005）一樣。
至於對特區同特區年輕一代嘅怨氣會點？周末時去咗繼Beyond散band後，我最喜愛音樂組合Brio喺拔萃男書院舉行嘅音樂會，超正。但中場時八卦行咗個圈，企喺一幢幢連大學都未必有咁高質嘅校舍群中，再諗起嗰啲政府起出來千篇一律、五六層樓高、白色、啲被重建逼遷中學最會用嘅校舍時，腦海浮現這個想法︰「呢啲就真係貧富懸殊，企喺到都想搞番次『無機會階級』革命呀。」
孫柏文
獨立股評人
http://facebook.com/shuen
本欄逢周二刊出