下個禮拜就係聖誕節，噚日消委會開《選擇》月刊記者會，都好有聖誕氣氛，每位出席記者都收到一份聖誕禮物，真係有啲意外驚喜。據聞今次係消委會破天荒送聖誕禮物，當然呢份禮物並唔係乜嘢貴重嘢，消委會送得禮，梗係要貫徹精打細算嘅原則，一定唔會好似某些號稱清廉嘅機構咁名不副實，送牛腩、魚蛋都要花千幾蚊咁浮誇。
消委會小小嘅禮物袋（圖）裏面，總共只有三塊唔同味道嘅曲奇餅，同埋一支迷你士的糖，全部經濟實惠，成本應該幾蚊都唔使，聽講仲係消委會職員親手負責包裝，可以話係物輕情義重。有記者即場一邊聽記者會一邊拆嚟食，話咁快就食晒，味道應該都唔差。