一日留在賭枱上，仍有翻盤一天；羅渣士（圖），聖誕節前，可能只剩兩場大戰，保住紅軍帥位！
英超，最多新聞除咗轉會，就一定係叫炒領隊；不過吹咗咁耐，今屆英超開季後，原來未炒過一人；係自95/96年球季12月初保頓炒麥法蘭後，呢班領隊，暫時一齊頂得最耐嘅一季。傳媒威力，有時不可盡信，尤其是吹水當食生菜嘅英國傳媒，炒領隊，未必係每位老闆指定救亡嘅動作。
上季同期，已經有5間球會換咗話事人；去年今天，咁啱熱刺炒波亞斯，呢間北倫敦球會，踏入千禧年後，換帥成習慣，至今已換咗11位領隊，其間最叻只兩次得英超第4，夢到歐聯。主因，購入嘅超新星、加里夫巴利大爆發；今季撬走修咸頓嘅普捷天奴北上倫敦主理，依然跌蕩。早前普帥被外界嘲笑過錯檔，但熱刺格局變化唔多，但起碼夠爭勝決心，近4捷聯賽，包括剛揚威史雲斯，有3次戰至補時奠勝；相反，季初神奇的修咸頓4連敗後，現只比熱刺多2分，「肥仔普」捱過呢關了！
季前「下一位離職領隊」熱門嘅李斯特城主帥皮亞臣，9月大破紅魔後，極速打回原形，11戰得2和9負，現成頂頭大熱。季前大冷，紅軍「未來希望」羅渣士，上屆兩奪每月最佳領隊榮譽，兼差點歷史性助紅軍首度封王英超；現在卻成「被炒次熱」，越嚟越似先行一步。英超走得快，危機易來易散，記得上季韋斯咸大Sam哥，被球迷插足全季，筆者每次去倫敦，必捧槌仔幫，貪必能即場購票；但今季補入幾位精兵，表現脫胎換骨，球迷熱捧，誰說老領隊必定守舊？
球迷，大部份短視，要求一定高，但紅軍今戰敗走奧脫福，將上季同地賽果倒轉開，輸運之作；當然大膽用巴利鍾斯替米洛列特把關，踢3後衞，再喺格連莊臣傷出後，用欠速度嘅老將高路托尼串演右閘（失第3球有一定責任，不能全怪洛夫雲解圍失效），羅渣士勇氣可嘉。插佢亂排陣，其實羅帥已用盡一兵一卒，比賽不停變陣，想扭轉劣勢；可惜紅軍諸事不順，史達寧及表現不俗嘅巴神已盡所能，遇着神龍迪基亞冇計！
全場數據顯示，呢場係「燒相書」比賽，曼聯表現一般，但贏3粒。照英超玩法，從來輪流威，紅軍如能保住士氣，加上隊內大將仍撐領隊嘅話，反底在望；明晚英聯盃8強作客英冠1哥般尼茅夫，同下周日迎戰阿仙奴，呢兩場聖誕前紅軍大戰，對季前用逾億鎊添兵，代阿蘇嘅羅渣士，壓力大咯！勸紅軍高層三思，上季9支在球季進行中易帥球隊，3隊照降班，強隊熱刺及曼聯最後分列6、7名；棄果敢嘅少帥羅渣士，可能代表今季紅軍提早玩完。
謹祝，羅帥聖誕快樂，大步檻過；明晚客W，必撐！文：波神
識睇，一定係睇足英台【英波Live】：
http://soccer.appledaily.com
http://bit.ly/engballlive