「你當我是龍蝦吧，誇張只因我很怕～」狼太唐青儀早前因為一襲人形龍蝦裝，得到全城注意，風光過後可能要復歸平淡，佢噚日同狼英出席一個基金會嘅就職禮，就喺人人打紅呔、穿紅衣、繫紅絲巾，並喺君悅酒店鋪晒紅地毯嘅喜氣洋洋氣氛下，棄大紅改以黑衣look示人，低調到不能，全程更加面燶燶，亦同老公狼英冇乜點溝通。
話說一身「烏卒卒」嘅梁太，噚日係以手袖長到手肘嘅黑色旗袍look，配以一對黑色高踭鞋登場，係咪想着最黑的衫、避免再變身龍蝦？八方真係唔知嘞，只見到唔少網民話呀，無論紅定黑，唯一肯定係，狼太衣着品味認真麻麻。
與老公零交流
而全身黑嘅狼太，心情同樣麻麻，全程面燶燶，可謂衣飾反映心情。佢喺活動上看似心不在焉，唔通擔心緊阿女齊昕，唔知又整張咩相放上網呃like？當大會司儀請佢監誓，狼太表現得有點恍惚，暗自愕然咗一下，然後要人帶佢去個台邊主持儀式。
八方所見，狼太同佢老公狼英雖然拍拖更現身，兩人全程卻近乎零交流，兩人幾乎望都冇望過對方一眼，「面阻阻」程度，可能更甚於狼英隔籬坐咗個唐唐、甚至田北俊喎。
李八方
mailto:[email protected]