米芝蓮作為一本飲食界聖經，唔少食肆都以摘到星為目標，香港五大商會就覺得香港呢個美食天堂，點都應該有個本地評級先啱，於是合作搞咗個港版米芝蓮《香港味之年賞》，評分最高係3A，其次係2A同A級，獲3A嘅只得7間餐廳，冇中菜份。
香港食肆太多，大會首先搵咗一班食評人提名食肆，再招募神秘食客去試食兼評分。呢批神秘食客經過一輪篩選，先從公開招募千幾人中，根據佢哋提交嘅「飲食履歷」選出150人，再參與由大會顧問搞嘅「龍門宴」，測試佢哋對美食嘅認知同寫食評嘅能力，最終由50位參與食肆評分工作。
神秘食客每次去試食，大會都會畀番300蚊作為津貼，今次總共用咗50萬元試食，要年年搞就肯定要有更多贊助先得。問到贊助商之一中華煤氣（003）市務及營業總經理黃維安會否加碼，佢就話要視乎來年計劃再考慮！