利福（1212）喺尖沙嘴嗰間崇光百貨今年初結業，由原址搬過去對面嘅喜來登酒店，呢間崇光上月初試業，噚日正式開張，老闆劉鑾鴻（細劉）一家兄弟姊妹罕有齊現身撐場。佢阿哥劉鑾雄（大劉）出名係Hermès（愛馬仕）大豪客，咁喜慶嘅日子，一家人當然要晒一晒Hermès喇。
劉老太披Hermès絲巾
大、細劉一家人噚日一字排開影大合照嗰陣，輕易就變成Hermès產品展，大劉嘅紅顏知己甘比與大劉個妹劉玉慧呢日竟然撞咗袋款，不過，咪睇佢哋拎住呢個Clutch細細個，睇清楚啲，上面個大釦鑲鑽㗎，聞說要過百萬元一個，相當唔嘢少。
至於大劉最細細妹劉玉珍就簡單拎個Birkin，再搭條靚靚Hermès披肩。
劉老太當然唔輸蝕，披Hermès絲巾，加埋一對波子咁大粒嘅珍珠耳環，離遠都睇到佢呢對耳環，仲有頭上面嘅潮爆閃閃頭箍，贏晒！
門口對開封路3粒鐘
未講佢哋身上嘅名貴衣服，大、細劉一家人呢身行頭閒閒哋總值一千幾百萬元，加上佢哋請到一位韓星做嘉賓，呢間崇光嘅門口又對住馬路，成件事嘅保安自然要加強好多。為咗呢個開幕禮，佢哋申請將崇光門口對開、中間道部份馬路封路3粒鐘，由早上11點封到下午2點，認真大陣仗。
可惜儀式一完，影完大合照後，劉老太與大、細劉一家人就分頭離開，細劉想快閃，但行錯路，避唔開記者問佢點睇雨傘運動，惟有一路耍手擰頭急急腳走人。
李華華
mailto:[email protected]