話咁快又到年尾，各大頒獎禮都陸陸續續舉行，BBC周日就喺格拉斯哥舉行一年一度嘅體壇風雲人物頒獎禮。今年事業、愛情同親情全部都非常得意，成為人生贏家嘅應屆F1總冠軍咸姆頓，就爆出小冷當選年度體壇風雲人物，認真大豐收。
咸仔女友妮歌今次唔喺身邊，唔緊要，仲有愛犬Roscoe陪佢行紅地氈。7年內贏咗兩次F1總冠軍，年尾頒獎禮又以超過3成得票贏到大獎，好開心嘅咸仔就話，今年29歲嘅自己仲有大把貨，想留喺F1起碼玩多7年咁喎。佢早幾日先話好享受音樂，考慮退休後唱歌出碟，睇怕呢個大計有排都未實行到喇。
不過，雖然咸仔今年成績都好好，但之前外界都估個獎係會由下半年連贏兩個大滿貫、世界排名上返第1嘅高球手麥艾萊贏到，點知投票結果顯示，僅僅得兩成人投佢票；更加令人意外嘅係，喺皇家馬德里踢到曉飛嘅加里夫巴利只係排尾3。不過，喺呢個所謂一人一票嘅選舉入面，其實只係得嗰60幾萬人投票，數字遠遠低過當地最紅嘅才藝表演節目X Factor；得出嚟嘅結果，大家都唔使太認真嘅。
識睇，一定係睇足英台【英波Live】：
http://soccer.appledaily.com
http://bit.ly/engballlive