民主黨噚日改選領導層，前主席何俊仁都有份競逐中委，但八方搵勻成個會場，就唔見佢現身，唔通自覺鐵頭能人所不能，坐定笠六實贏梗，所以連黨大會都唔出席，現場拉少張票都唔可惜？八方一問之下，先發現仁哥原來上周五入咗醫院，噚日先出院，返屋企休息，無奈下被迫要缺席。
仁哥話呀，十幾日前喉嚨開始唔舒服，但呢排忙到一直冇時間睇醫生，後來感染，搞到哮喘復發，但佢都冇理，照舊等到金鐘清場俾人拉。嗰晚冇瞓過，之後兩日又瞓得少，終於頂唔順去睇醫生，醫生幫佢檢查完鬧佢「有冇搞錯」，責難佢咁遲先求診，要佢留院兩日，好彩冇乜大礙，多謝各界關心。