俗語話：「唔做中，唔做保，唔做媒人三代好。」不過，喺網絡借貸似乎做個稱職嘅中間人先可以突圍。美國網絡P2P貸款公司Lending Club，由網絡借錢中介人起家，上星期喺美國紐約掛牌，省靚咗P2P網貸嗰招牌。
創立僅八年嘅Lending Club，定位清晰，一心要做個稱職中介人而唔係銀行。同近日打出名堂嘅call的App「Uber」一樣，Uber幫人搵的士，Lending Club就為有需要融資嘅客戶搭橋鋪路借錢。Lending Club點樣搵錢？就係靠收取交易費、服務費同管理費。例如交易費收入，即借貸息差收入，由2006年到2013年急速擴張十幾倍，平均息差都有4厘。
想借錢嘅中小企，繞過傳統金融機構、銀行，借貸融資更方便，簡化手續。願意借錢嘅人多咗，貸款人可以分散風險。傳統銀行業對於網絡P2P又唔使太擔心，網絡借貸仲未經歷過一個完整信貸同經濟周期。唔怕萬一只怕一萬，遇上一借無回頭嘅債仔，仲有嚟緊美國加息嘅影響，網絡P2P借貸嘅抗逆能力到時先知。
Lending Club首日雖掛牌報喜，比起招股價15美元勁升56.2%，但網絡P2P借貸宜家領先，冇話保證以往都第一。其他中、小型網絡P2P借貸公司都以Lending Club為模範，取長補短後創新路，Lending Club要諗計保持一哥地位。
C+B
本欄逢周一刊出