金鐘清場前夕，在飯局碰上一班傳媒人，有幾位係老總級，本來食飯係校友聯誼，但傾傾吓就走唔甩佔中、清場呢個話題。一位老總話：「我同意你講過嘅嘢，就係梁振英玩政治一流，管治就唔入流。」
管治唔入流正是因為梁振英掛住玩政治，做事每每有政治考慮，唔係以民為本。好似今次佔領運動咁，梁振英老早可以下令清場，但特區政府顯然一開始就決定用拖延戰術，大打消耗戰，務必要拖垮學生之精神意志，目的係打殘學聯、學民，大挫對手士氣。有咗呢個出發點，特區政府嘅具體做法就係下令警察容忍、克制，出過一兩次衝擊意外，惹來批評之後，就立即停手，又利用民間團體申請禁制令，作為清除路障嘅藉口。其實袁國強都講得好明白啦，警察絕對有權清除道路上一切障礙公共交通及阻塞道路嘅行為，清場唔使事先請示法庭，既然係咁，做乜要由代理人搞一番法庭手續，做足一切程序先至事先宣揚會清場啫？
咁樣做法基本上就係想市民對交通擠塞不耐煩，對零售生意受困擾不耐煩，口出怨言，由贊成佔領，至改為中立，再轉為反對佔領。市民態度變化之過程已經發生，從中大及港大民意調查可知，佔領運動開始個零月之後，民意已逆轉，梁振英民望竟然上升㖭，你話佢係唔係閂埋門偷笑到唔識出聲呀，佔領運動拖延日久，對梁振英最有利。
至於政府點解決定在十二月十一日清場，真正理由唔知，左丁山相信係梁振英決定「止賺」。左丁山察覺到不少商界人士、親建制人士認為學生已經師老兵疲，現場佔領人士日少，但警察仍然懶懶閒，唔清除交通障礙，直情係故意「躺死不幹」，令佢地對梁振英有微言，話佢掛住玩政治，不願有場不清，有事不做。此外，拖延退場雖然對學生及示威人士嘅民望不利，但對警察精神體力士氣同樣構成傷害，令警察心生暗火，容易搵人出氣，有碰撞就揮動警棍打人，出手特別重，再有衝擊之事，講唔定香港警察會變成美國警察，到時就連梁振英都拖累埋。上星期四清場或者係梁振英覺得適合佢嘅決定，但事情不會就此完結，梁振英暫時贏了一場戰事啫。