唔知係童心未泯，還是大家都懷念舊陣時，呢兩個月唔少人談論中環擺花街一間英式糖果店，聽老闆Raymond所講，原來糖果唔只係小朋友嘅至愛，開業大約兩個月，佢發現大部份顧客都係20至35歲嘅OL。女性除咗買衫買鞋買手袋，果然係最鍾意買零食。
34歲嘅Raymond喺投資銀行做咗大約10年，今年決定創業，佢嫌中環已經有好多咖啡店、食肆，想試新嘢，於是決定開英式糖果店。
佢間舖喺正泰昌餅店隔籬，自然吸引埋遊客生意，佢話，10月中開張以來，遊客嘅平均消費最高，平均有400至500元；其次係OL客，平均消費過百元，學生哥就每次買20至30元左右。
雖然話多人幫襯啫，但係擺花街舖租唔平，月租十多萬元冇走雞，賣一百幾十蚊嘅糖果，夠唔夠交租㗎呢？粗略計算，計埋燈油火蠟、入貨、人工，Raymond一個月起碼要做20萬元生意；佢唔肯披露實數，只係話差唔多。
Raymond坦言，經營呢盤生意絕對唔輕鬆，暫時雖然叫做圍到皮，但係要捱，佢希望慢慢儲到熟客，將來做到成績。