我求大俠前晚睇德甲，發現多蒙特教練高路普得番啲鬚根，唔再係一個四眼鬍鬚仔。佢無啦啦剃鬚，好明顯想轉運，但睇嚟唔係好work，佢隊波以0:1敗走哈化柏林。周三佢哋喺德甲快車迎戰禾夫斯堡，唔知佢會唔會剃頭呢？
紅軍有意搵佢頂羅渣士
高路普之前教緬恩斯時塊面乾乾淨淨，不過自從喺08年夏天轉投多蒙特後就開始轉look，變咗個鬍鬚仔。今季多蒙特喺德甲黑到爆，成日係踢得好嘅情況下輸波，而且啲主力仲轉流傷，所以高路普亦似乎想轉look轉運。查實喺上周中場歐聯，佢就將啲鬚剪短咗，而去到上周六場聯賽，啲鬍鬚直頭唔見晒。好可惜，佢呢個唏噓鬚根look都係幫唔到蜜蜂兵團，佢哋以0:1作客輸俾哈化，射爆佢哋嘅大門嘅，仲要係佢嘅舊將舒希巴，真係激死佢。現時佢哋以4勝2和9負排尾3，睇嚟真係要為護級而戰。
高路普賽後話：「呢場波我哋有4至5個黃金機會，可惜一個都把握唔到。」多蒙特輸波之餘，仲要傷埋米希達利恩，高路普話呢個阿美尼亞進攻中場周中肯定缺陣，而且極有可能連周六對雲達不來梅場波都踢唔到。若然多蒙特歇冬前再冇起色，高路普可能要引咎辭職，但佢唔愁冇出路，事關阿仙奴及利物浦都想搵佢嚟教波。另外，隊長曉姆斯完場後冇答謝球迷就閃咗，令人相信佢有可能喺1月嘅轉會窗離隊。
拜仁提早拎冬季冠軍
多蒙特繼續頹，佢哋嘅死敵拜仁慕尼黑就延續強勢。前晚拜仁憑洛賓梅開二度，加上貝拿迪亞同埋羅拔仔亦各入1粒，作客4:0大勝奧格斯堡，報番上季俾對方結束53場聯賽不敗走勢之仇，兼且提早兩輪宣佈成為冬季冠軍。呢場波佢哋門將紐亞又示範乜嘢係清道伕龍門，棄門跑30碼喺禁區外鏟走對手腳下球。此外，小豬舒韋恩史迪加喺被換出時整蠱隊友拿菲爾，作狀同佢high-five，隨即撥頭髮，搞到拿菲爾鬼咁尷尬。
與此同時，史浩克04雖然喺上周中出線歐聯16強，但前晚主場對科隆竟然輸1:2。輸波經已夠慘，佢哋助教胡布舒爾俾一個Zippo打火機掟中爆缸見血，警方暫時未拉到人，所以未知係主隊定係客隊球迷做嘅「好事」。
識睇，一定係睇足英台【英波Live】：
http://soccer.appledaily.com
http://bit.ly/engballlive