A股瘋狂炒作，唔止為港股帶來小陽春，就連一直被人睇死嘅紙媒都有新成員，一本名為《港股策略王》嘅新財經周刊上星期悄悄出版，薄薄一本賣成18蚊，值唔值就見仁見智。
有新雜誌出版對於傳媒界當然係好事，即係話呢行仲有空間發展，之但係，街坊智慧又話畀我哋聽，每當有財經雜誌創刊，就係大牛市見頂先兆。
最經典嘅例子，莫過於《iMoney智富雜誌》。呢本經濟日報（423）旗下財經周刊，喺2007年10月27日橫空出世，點知三日之後，恒指就喺31638點見咗頂，牛去熊來，喺金融海嘯洗禮下，短短一年唔見咗七成，重創唔少股民心靈。
無獨有偶，《港股策略王》上周三出街後，A股腳仔軟之餘，港美股市更加唔見咗一截，唔通呢個宿命真係咁難打破？