「林伯」果然老而彌堅！36歲嘅林柏特喺上周六英超作客李斯特城時，喺40分鐘一箭定江山，協助殘陣嘅曼城以1:0險勝；而呢球更加係林伯歷來喺英超嘅第175球，追平前阿仙奴射手亨利嘅紀錄(見附表)，成為英超歷來第4多入球嘅球員。
藍月亮喺上周六作客包尾嘅李城，幾經辛苦之下先由林伯喺40分鐘射入全場唯一嘅入球，全取3分。呢一球亦係林伯由紐約城借到曼城後，第6個入球，兼且係佢喺英超嘅第175個入球，唔怪得之連藍月亮嘅領隊比歷連尼都話想林伯留到3月啦！對於自己可以成為英超歷來第4多入球球員，林伯話：「我好開心，我之前都冇諗過可以有呢個里程碑，而且可以同亨利齊名，我深感榮幸。」
不過，由於曼城嘅前鋒迪斯高喺呢場比賽前拉傷大脾，加上阿古路同祖維迪都有傷，而隊長兼後衞嘅高柏尼亦喺比賽中鼠蹊受傷，所以曼城好可能要殘陣踢聖誕快車期。
識睇，一定係睇足英台【英波Live】：
http://soccer.appledaily.com
http://bit.ly/engballlive