第四場香港瓶畀外隊重奪，主隊於第五場1200米香港短途錦標還以顏色，蘇廐「友瑩格」忽然改變戰略不留後，今次開閘第一隻彈出，就此貼欄一放到底，放死對手，以3.9倍次熱身份取勝，為主隊重奪失落兩年之香港短途錦標，此場「友瑩格」有獎金10,545,000元；跑第二係韋達座騎大熱門東廐「幸福指數」，三、四名「真誠少女」同「拜倫勳爵」都係50倍開外之外隊代表，四重彩派14萬幾。
主隊對上一次贏香港短途錦標係2011年，當時由「天久」分別同平頭亞軍「盈彩繽紛」及「時尚風采」包辦主隊Q，今年「友瑩格」同「幸福指數」分別由潘頓同韋達策騎，港隊累積11勝香港短途錦標，成為大贏家。
講番「友瑩格」，上次跑馬會短途錦標慢閘兼直路被撞，結果敬陪末席，今仗起步冇再失機，最終成為新一匹包尾變第一之神奇馬，帶挈潘頓同練馬師蘇保羅，雙雙首勝香港短途錦標，馬主楊毅亦然。
當中蘇保羅09年曾以「友誼至上」拎到香港一哩錦標季軍，今次係佢從練首勝香港國際賽。「友瑩格」累積七捷全贏田草千二米，至於「幸福指數」贏完馬會短途錦標，於正本戲屈居亞軍。英國代表「拜倫勳爵」，臨尾畀日本馬「真誠少女」追過跌落第四，此駒第四度征港，三次跑第四未能上名。