中央喉舌新華社，喺近期由超級大好友，變為超級大淡友。之前喺9月，三日內連發八篇唱好文章，但最近又日日發文，叫股民小心風險，上周五更連發四文唱淡。到底發生乜事？
原來係講孖展槓桿好大鑊。其中一篇講到，散戶地下民間集資，用1蚊炒10蚊股，即係9倍孖展。你冇睇錯，係9倍。
現時喺大陸證券行，正規孖展嘅槓桿係一倍，大戶可以買傘形信託，槓桿可以去到兩倍，前者所買嘅股票，跌到80%就要call margin或斬倉，傘形信託大概係跌到90%。如果用9倍孖展，你估跌幾多就要補倉？恐怕不到5%！
以而家A股市況，股份即日波幅5%以上係好閒事，啲「中國大媽」用9倍孖展入市，恐怕即日已被震走，好快連渣都冇。
值博率仲衰過去澳門。好喇，9倍孖展盤要斬倉，跟住輪到8倍、7倍，一有風吹草動就有骨牌效應，全世界都走唔甩。
而家證券行孖展餘額大概9,000億元，傘形信託大概2,000億元，根本唔夠撐起每日近萬億元嘅成交。如果係由呢啲9倍民間地下孖展盤撐起，咪話新華社，你同我都驚！
李可強