投機買賣好比行軍打仗，需要長時間集中精神分析來自四方八面嘅訊息作出決定。雖然現時科技發達，只要善用工具輔助，就可更有效率把握入市出市時機，但始終倉位波動會影響情緒，持續作戰太耐，少不免心力疲累，適當時候抽身離場，作中場休息，這不是懶惰，而是為了走更遠嘅路。不過日軍偷襲珍珠港一役提醒我哋，戰事一日未完，即使客觀環境平靜，每日都要小心俾人偷襲，加上我上周中已在facebook表示美股將轉弱，大家明顯見到我近日在電台節目中叫不要打持久戰，放棄長期持有概念股，或最低限度做減持，情願將小量注碼放在個別異動股，如此這般，大家便可避過近日的大調整。
油價回落 載通有計
跌市元凶來自油價，但有危亦有機，國際油價從年初90美元以上水平，滑落至上周五失守60美元大關，足足唔見咗三四成。直接同石化產品有關連嘅板塊一早出現咗股災，三桶油即中石油（857）、中石化（386）及中海油（883），這兩個月股價走勢係破底後再破底，段段蟹貨，只宜炒反彈，我亦成功博了一轉，但長線來看，未到buy and hold之時。
石油公司賺唔到錢，自然就係諗削減成本，今個月已有幾間國際油企表態，縮減未來投資開支，連帶生產設備股及油服股，短期都唔使再諗。另一方面，用油較多嘅航空股已經起飛咗，東航（670）及南航（1055）已較年中低位升咗差唔多成倍，國航（753）則升逾五成，現時才博有兩大風險。第一，假如好友挾石油淡倉，令油價迅速反彈，相信這三家航企會出現大量獲利盤，來一轉又快又急嘅調整。第二，以往油價波動，總有內地航企因對沖期油而虧損，殺市場一個措手不及。以香港為基地嘅國泰（293），原是最好嘅選擇，但廉航殺入本港之勢越來越強，拖住國泰後腳，令其不能高飛。故我暫時不會揀航空股，去捕捉油價滑落帶來之機會。
反而最得我心嘅係九巴母公司載通（062），過去三年載通一直承受高人工及高燃油之困，加上銷售物業收入不多，令盈利處於過去十年之偏低水平，股價亦於低位徘徊。直至上年中，載通爭取到「區域性模式」巴士路線重組，更有彈性地提高路線嘅營運效率。再加上油價大跌，每年約15億元嘅燃油開支有望大減。若相關開支跟足油價跌幅，盈利可能多4億至6億元，即2015年盈利隨時倍升，重新成為一隻高息公用股。喺現時低息年代，受到市場追捧都唔奇。
另一賣點係，載通持有嘅工廈亦逐漸改變土地用途。這批工廈當年嘅成本超平，若能以低成本完成補地價，隨時能為股東帶來驚喜。難得搵到間淨現金、穩定派息、大勢轉好，仲有啲驚喜位嘅公司，希望載通會喺下年適用於buy and hold策略，比大家多一個選擇。當然，若各位開返載通幅圖睇吓，就會見到過去一個月升得非常靚，呢隻嘢除咗中長線坐貨外，短線可能都係唔錯嘅選擇。
張士佳