女人多數鍾意打扮，唔少在港上市嘅內地企業女董事早年每次現身都悉心打扮，明艷照人，化個靚妝，配名貴套裝，再加閃閃首飾係最基本。
令人印象最深刻包括前總理李鵬之女、中國電力（2380）董事長李小琳，以前佢每次出現都一身名牌，玖紙（2689）董事長張茵亦不時戴住大大粒紅寶、藍寶，只係習總上場後推行節約，佢哋先至大為收歛。
噚日瀋陽盛京銀行（2066）舉行招股記者會，唔知係個人風格，還是貫徹習總方針，58歲董事長張玉坤喺鏡頭前嘅打扮相對樸素，好似連口唇膏都冇塗，眼見較為名貴可能係頸上面嗰條「飛甩雞毛」絲巾。早前市傳張玉坤喺內地涉及調查，又傳佢被限制出境，雖然𠵱家佢人在香港可以闢謠，但睇落佢都一臉疲態。