第七場大摩馬房的黑衣巨人「步步友」，以四又四分一身位之先、1分33秒49極佳時間，輕取香港一哩錦標，今場獎金13,110,000，連捷於1600米。二、三名分別係香港「大運財」及日本「大賽波士」，主隊再於此賽食Q，兼且完成同一賽事九連霸，反觀上屆盟主「精彩日子」衛冕落空只跑第五，在港首度季內初出冇Q。
今場由首次熱門包辦2.1倍大熱Q，一對主角「步步友」同「大運財」連續兩場囊括連贏，事實證明香港馬匹中距離實力值世界頂級。而「步步」系馬主李福鋆醫生以往憑「步步穩」於香港一哩錦標攞到一冠一亞，當中2011年此駒以66倍成為此賽最冷頭馬，今年「步步友」則以1.3倍成為此賽最熱頭馬。李醫生近四年內第二度贏呢項國際G1；「步步友」同「步步威」今季各贏兩場都係盃賽，呢位老牌馬主更加捧盃捧到手軟。
「步步友」體重雖接近1,300磅，但每次都贏得好瀟灑，今場更加掟甩沿途喪放之「大運財」收韁贏馬，累積六戰1600米五冠一亞全入Q，表現充滿馬王風範，極有可能是全球最佳一哩馬。
另一邊廂，「大運財」撞正「步步友」，有生不逢時之感，上仗馬會一哩錦標已經受挫，呢鋪除眼罩初戴開縫罩，韋達把心一橫喪放偷襲，可惜完全頂唔住「步步友」之神級後勁，此駒連續兩屆香港一哩錦標做二奶。