港隊贏夠三場國際賽至肯罷休，一對新舊馬王於尾關第八場2000米香港盃交足功課，大熱門上季馬王「威爾頓」直路初落後極遠，以為追唔切，但衝足一條直路下，最後一步影相氣走次熱門前馬王梁芷珊愛駒「軍事出擊」，重開勝門。
主隊今屆贏香港短途錦標、香港一哩錦標及香港盃，均包辦連贏；港隊同時已連贏四屆香港盃；呢場第三名係澳洲代表「模範駒」，一對澳洲騎練布文同大衛希斯回師香江有獎金落袋。
「威爾頓」貴為上季馬王，今季跑咗三場最叻得第三，呢場去到戲肉強勢回歸，臨場受巨額過關影響變大熱，開跑時只得1.9倍，早段包尾，轉彎前開始從外叠力騎，衝足整條直路，原本一直畀前季馬王「軍事出擊」Head住，不過拉士幾十米「威爾頓」一換腳更勁，短馬頭險勝捧走香港盃。大摩同雷神加埋第七場以「步步友」贏香港一哩錦標，包辦一口國際G1大熱孖寶，成為今年大贏家。
至於「軍事出擊」功敗垂成，未能為「軍事」系敲響國際賽勝鼓，不過此駒轉方廐後三戰一冠兩亞，仲未甩Q。今年香港盃總獎金加到2,500萬創新高，「威爾頓」頭馬獎金有1,425萬，以馬主佔七成計，主角鄭強輝有近一千萬落袋；此駒亦追平兩匹前輩「爪皇凌雨」及「事事為王」紀錄，同年內贏完打吡再贏香港盃。