彭博億萬富豪指數上周五顯示，阿里巴巴創辦人馬雲以3億美元（最新為5億）之差，贏咗長江實業（001）主席李嘉誠，榮登亞洲首富。超人坐咗首富個位咁耐，突然換咗曾嘲笑香港大孖沙嘅馬雲，是則juicy新聞。之不過咁，彭博曾經計錯數，超人身家曾低過嘉華集團主席呂志和，後來靜靜雞修正當無事。
基於對呢個指數極度懷疑，搵個身家資產分類睇睇。睇完，我很肯定馬雲身家至今仍未高過超人。
彭博計算馬雲資產包括3間上市公司（阿里巴巴、恒生電子及華誼兄弟）、持有支付寶的螞蟻金融服務集團、香港7,000呎Penthouse等。
超人的資產除了兩間旗艦上市公司長江實業以及和記黃埔（013），就只有長江基建（1038）、和記電訊（215）以及赫斯基能源，兩人另計現金及其他資產（見表）。
唔係呀化？馬雲間Penthouse都計埋，咁超人間深水灣大宅呢？坊間各式富豪榜從無講清楚點去估值非上市資產。超人打本畀紅顏知己周凱旋嘅維港投資呢？超人「第三個仔」李嘉誠基金呢？姑且當彭博計入李嘉誠總值30億美元「其他資產」內，依然唔啱數。
香港大孖沙最叻係咩？係財技。超人玩「以小控大」最出神入化，僅透過揸43.33%長實，垂直地控制數以萬億資產王國。如果僅以上市公司持股股數計算身家，就低估咗最底層公司價值。相信彭博未將市值1,600億嘅電能（006）計算在內，就因為佢屈喺長實下面間長建嘅下面。
失落亞洲首富，超人透過發言人回應「中國的年輕人幹得很好，我對此只有感到高興」，用高登話繙譯係「儍的嗎？」
何淑茵
mailto:[email protected]