香港毀容了。土豪金、大屏風、假懷舊建築爭相拉低城市格調，俗氣撲面而來，時運低望到都想嗌回水。難道回歸以後，惡俗就是大道理？愛你所以鬧你，知名品牌設計師李永銓（Tommy），點評香港思歪建築五大，力證品味無下限。
記者：葉青霞
攝影：梁志永、林栢鈞、黃子偉
如真要比較建築設計，新加坡與南韓都是香港神一般的對手，而我們只有豬官員與狼發展商。南韓政府識得狂谷創意產業，建築也活潑起來。新加坡深明提升市容，等同省靚招牌，外國投資自然送上門。兩地建築趨向精緻，香港卻退步到一個點，新近落成的建築核突到叫人掩面狂奔。「與時並進」不適用於香港？Tommy說：「政府好多人還在看20年前的東西，幫年輕人搞舞會都講得出。用老人家思維諗創新，錯晒。」領導品味如何，香港市容也必如何，有建築人才，都無補於事，理念實現到一半都叫多。「大家都當設計是服務性行業，一層一層給意見，不斷破壞設計。想低調但顏色要sharp，點先？」外加18區發展計劃支離破碎，政府對城市規劃冇遠見，保育唔識做，俗氣建築梗係浮面。
回歸後 惡俗文化入侵
戰後香港經歷艱苦歲月，建築講求實用，平庸是應該的。八十年代經濟起飛，中環劇變，陸續出現特色建築，甚至世界級傑作如匯豐銀行，而後來的失焦與97主權移交不無關係。「共產黨文化只能用兩個字形容──俗氣。它們的歌舞、電影與海報，唔怕醜，只怕你睇唔到。1949新中國到鄧小平在位的幾十年，中國沒一棟靚建築，之後靚的都出自外國建築師手筆。」
回歸後惡俗文化入侵香港，是意料之內。酒店為迎合自由行口味，自貶身價，一味的金碧輝煌，失禮到暈，發展商惟利是圖也在城市景觀上多踩兩腳。「冇諗過用建築美學為樓宇增值，只用盡空間賺盡分毫，停留喺30年前思想。」屏風樓鬧極都有，一再騎劫西九，城規部門辦事不力。「產品設計做得唔好，市場會淘汰，但一棟肉酸建築落成，閒閒哋污染視覺四五十年，好霸道。」做人不能太689，建築也不應太思歪，真想有正義推土機鏟之而後快。
設計災難 華麗精品酒店
Tommy品評：
成棟樓好似神主牌，盂蘭節經過真係撞鬼你。中間無啦啦擺四個細粒logo，但上下兩個酒店名字中文字款唔統一，而且是PC字體，設計行內根本冇人用，還要寫簡體字！英文名字款又唔跟logo字體，這是我們做branding的大忌。
華麗精品酒店
銅鑼灣堅拿道西號
發展商：華大地產
設計：不詳
霸道屏風 Grand Austin
明年10月才落成，但單位一早賣晒。複式戶最高呎價逾4萬蚊，邊個買得起？你懂的。據知部份單位有奇則，單是超長走廊已搶你200萬！
Tommy品評：
有天駕車經過幾乎認唔到呢度。屏風樓反映中國人自私心態，為了戶戶向海賺到盡，起到有咁平面得咁平面，完全騎劫其他樓宇景觀，然後係咁易開個窿比你唞氣。九龍的海岸線被屏風樓搞到醜晒。
Grand Austin
柯士甸道西9號
發展商：會德豐、新世界發展及港鐵
設計：王歐陽（香港）有限公司設計
東莞夜總會 中央圖書館
造價約7億的圖書館採後現代古典主義設計，但這風格於八十年代末已過時。
Tommy品評：
外國的圖書館可屹立百年，但我希望中央圖書館永不超生。官員品味好有問題，以為加些銅像、羅馬柱、雲石就是歐式建築？它似東莞好cheap嘅夜總會！在咁好嘅地段起一個咁差嘅建築，等同自殺。
香港中央圖書館
銅鑼灣高士威道66號
設計：建築署高級建築師何超凡
衰過佈景 中環碼頭
第四代碼頭模仿1912年第二代碼頭的維多利亞式風格。乘坐小輪望過去，覺得它像極佈景，假過無界織髮。
Tommy品評：
當年反對聲音咁大，難明林鄭月娥為何不考慮徙置包浩斯風格的舊天星碼頭，而只保留大鐘重建。仿古新碼頭實在太假。人家埃及千年古蹟神殿要遷移，利用雷射切割成小件再於新址組裝都冇問題，保育都係睇有冇心。
中環碼頭
中環民光街
設計：天星小輪
勁似油庫 醫管局大樓
醫管局大樓會議廳使用率低，以木為建材，冷氣長開防潮，用電驚人。後來花近1,200萬重新裝修，浪費公帑。
Tommy品評：
比例失衡，圓桶形部份過大，令建築似油庫。夾硬在上面加上飾花，都彌補唔到冇層次、冇肌理嘅缺點。
醫院管理局大樓
九龍亞皆老街147B號
設計：不詳
讚！ 理大創新樓好破格
香港近年只得醜建築？非也，Tommy認為今年才開幕、由國際大師Zaha Hadid操刀的理工大學創新樓，令人嘩一聲。「雖然有人覺得線條扭曲的新派大樓與理大的紅磚設計唔襯，但我覺得好破格。」這更令他想起當年貝聿銘為羅浮宮建造玻璃金字塔建築受到民眾反對，法國總統密特朗以其仕途作擔保力保其設計。「這在華人世界應萬中無一吧！」
