今屆國際賽其中一個焦點，就係上季香港馬王「威爾頓」能否回復水準；而呢朝大賽前夕嘅公眾早餐會，雷神就劉華上身，着西裝戴頸巾，靚靚仔仔，搞到啲Fans好似螞蟻見蜜糖咁，黐到佢實一實，猛咁要求合照同簽名。但雷神同Fans分析國際賽座騎機會時，只表明「步步友」好有贏面，而「威爾頓」僅說估計有進步演出，口氣一般咋。
「威爾頓」上次跑第五，今次如跑第四都算進步演出，如果係咁捧場客就慘咯。呢匹馬今季三戰最叻第三大為走樣，大摩講過佢嘅健康鬥心都OK，只係之前有偏肥問題，狀態未返回最佳水準。睇睇今次體重1086磅，比上次略輕7磅係好現象，但比上季最佳時嘅1062磅，仍然重咗廿零磅，唔排除跑完今仗香港盃，下仗先至去到最fit。
咁如果肥馬王不行了，今場邊隻可取而代之？外隊最強嘅「天鷹翱翔」賽前傳出不良於行消息，真係有啲危；最似樣反而係「威爾頓」嘅前廐侶兼前馬王「軍事出擊」，呢匹名人梁芷珊嘅愛駒，轉投方嘉柏馬房後兩戰一冠一亞，表現不比年輕時遜色。當日大摩堅持唔畀「軍事出擊」配潘頓，最終梁芷珊將愛駒拉離摩廐。如今大家分道揚鑣，盃賽當前有你冇我，梁芷珊唔趁勢出擊就假咯！