體育運動，如戰場，必分勝負。勝者一將，下有萬骨。贏咗當然風光，但輸，一係就接受命運，認定自己一世無緣，否則，返歸卧薪反省，再不斷嘗膽訓練，咬實牙根等還拖。你有冇見過任何一名運動員、一支球隊未輸過？
曼聯（圖）仝人最近5連勝爬番上第3，曼迷當然食花生開香檳，之前兩個月大家受盡網上欺凌，𠵱家風水輪流轉，贏波贏盤。反觀利記，上星期二歐聯生死戰諗住冇黐牙，點知巴素利都同你和，今晚仲要對住腳風順嘅紅魔，祝好運。
球迷既然慣性面對輸贏有時，高低有時，理應知道波係圓，世上有九萬幾樣聯賽你玩，冇球隊可以永遠惡晒，今次衰咗，至多同你鬥長命下次再嚟。
君不見日本，90年代搞J.league，10年後搞世界盃再小組首名，16強對土耳其方輸1球止步，到今日已經係世界盃常客，仲有大把fans。風光背後，你可以上網睇吓佢哋政府同民間放咗幾多資源時間同空間落去，連天台都會起個球場做青訓，你就知得來不易。
香港隊友，今仗其實係熱身賽，75日仲只係上半場，𠵱家返更衣室唞唞先，整理完身體同心情，再等下半場。上半場打得不完美但漂亮，對住魔鬼隊「夫添」，你仲想點？佢哋都打咗75日至可以喺金鐘影團體相。唔廢噏咩「階段性成果」，因為根本只係開始。輸，我哋唔怕，因為有日實翻本有凸，有排玩，你預備出場未？（順道恭賀伍家謙新婚一周年）
梁栢堅
填詞人+彩池人