「我冇諗過自己今日有咁多機會掂波；周圍咁多鏡頭影住，我仲以為佢今場會入4、50分破紀錄㖭。」一聽就知係尼克楊格寸緊拜恩（圖）。湖人上周五作客馬刺，拜恩只係入到22分，仲未破到米高佐敦（MJ）嘅得分紀錄，但球隊就靠楊格射入符碌3分，加時以112:110贏波。
賽前拜恩累積得分32,262分，大家都好期待佢入31分，打破MJ嘅32,292分。不過，今場又控衞上身嘅拜恩，最終只係攞到22分，仲差9分先超越到MJ，要等周日作客木狼先可以成為史上得分王第3位。至於繼續屈居後備嘅林書豪，喺加時最後1分鐘獲委以重任落場派牌，不過喺球隊嘅最後一個攻勢，佢接到波之後過唔到人又射唔到波，又唔傳畀空晒嘅韋士利莊遜，竟然將個炸彈丟畀企喺3分線外幾呎兼有真路比利擋住嘅楊格，搞到拜恩都好不滿。好在楊格夠運，臨急起手射球3分都入，最終湖人就係靠呢球贏到今季第7場勝仗。
楊格招積自稱I don't miss
完場前7.4秒符碌射入奠勝球，贏波大功臣楊格賽後就寸寸貢，話自己新花名叫IDM（I don't miss嘅縮寫，即係百發百中）。
一直強調贏波重要過個人紀錄嘅拜恩，今場玩埋分波，全場交咗9個助攻，但喺關鍵時刻幾次失誤，差啲累湖人輸波。不過波已贏，球隊升到上西岸第13位，拜恩心情明顯好靚，賽後笑住回應「廁紙事件」，話成班隊友今場都打得好好，仲特別點名讚林書豪同楊格，仲話自己引以為傲喎。至於馬刺雖然斷咗主場6連勝，但前鋒鄧肯今場射入19分後，以累積25,197分超越咗謝利韋斯，進佔得分榜第18位。
識睇，一定係睇足英台【英波Live】：
http://soccer.appledaily.com
http://bit.ly/engballlive