有啲衰嘢，當年衰咗之後真係喊濕幾個枕頭。但人好怪，經過歲月踐踏後，有日你發現之前嗰啲衰嘢，原來都係黎明之前嘅黑暗，唔係曾經跌過，根本你就唔會識得企番起身。
元朗足球隊有位新丁鄭璟昊，最近入選香港隊踢省港盃，佢話喜出望外，諗番轉頭佢以前教練同佢講咗句：「鄭璟昊邊踢到波？」當年聽落確實難過，之後先知係勵志歌。今年韋斯咸同修咸頓令人刮目相看，不過槌仔粉絲似乎雀躍得多；無他，因為笑點低得多，去年今日，修咸頓爭緊歐洲賽資格，韋斯咸仲係護緊級，原來跌得越低，越易攞進步獎。
講波佬老生常談，每當一隊波年輕有活力，咁順境波一定好踢，但係要見真章，就要睇吓落後嘅時候後生仔識唔識踢，而年輕嘅球隊落後通常都會自亂陣腳，輸多兩粒。無他嘅，逆境波係要身歷其境先知道係乜嘢一回事。所以話難得落後時，傷心係其次，首要係儲番多啲逆境波嘅飛行里數。 呢個世代乜都有得教乜都有得學，就係逆境波冇得教。當事人自己唔接受，旁邊鼓勵說話都變得無謂，但能夠自發功嘅話就一切冷言冷語都可以自己re-heat。
本周末出發先興奮，因為一星期之後就會去台北跑個半馬。正所謂邊度跌低邊度起番身，1年前本人喺台北球場草上飛，結果撞人不成反而被四眼猛男震落地，斷送一條韌帶之後情緒曾經相當低落，連平時嬉皮笑臉嘅脾氣都冇埋，當場將對靚波砵掉咗落垃圾筒，以洩心頭之憤，然後喺回程時不斷咒罵嗰位四眼猛男，受傷梗係話對手茅啦！之後由照X光到斷症到物理治療期間，自己都好似冇晒信心。去游水復康，睇住隔籬游過阿伯嘅眼神，好似話我阻住佢嘅地球轉咁，嗰一刻，我信心直插水底。
後來先知就係因為體能不足肌肉孱弱，韌帶先會失守，所以好番之後決定畀心機練多啲體能， 相信1年之前嘅我應該點都估唔到，1年之後嘅我可以跑得更遠。我已經諗定過終點嗰一刻要開心笑，因為總算可以笑到最後嘛，除非到時咁好彩俾我撞番四眼猛男，或者我會忍唔住，同佢 say個hi！
KEYMAN
節目主持