今屆國際賽之中，有一匹外隊馬係大賽長青樹，而且仲係由港人馬主擁有，就係香港馬會前主席夏佳理嘅「紅色禮物」。
「紅色禮物」戰績有幾勁？隻馬出賽47次攞到7冠12亞6季，超過半數跑入三甲，曾經喺全球獎金最高嘅杜拜世界盃跑第二。而過去三年都有跑香港瓶，2011年同「銀塘勝景」得平頭季軍，2012年就擊敗「網絡電郵」成功勝出，去年則跑第四。雖然「紅色禮物」已經8歲，但戰鬥力完全冇退化，上月喺澳洲墨爾本盃勇奪亞軍，係佢第三度喺墨爾本入Ｑ，練馬師鄧樂普曾表示，大會應頒一座墨爾本盃銀獎畀隻馬。
鄧樂普又話，「紅色禮物」至今所作的遠征航程距離，已有約25萬公里，出賽途程大約77英哩，由於已八歲，部署唔可大長遠，要睇睇周日第四度出戰2400米香港瓶後，再慢慢決定明年會否再到杜拜或澳洲參賽。鄧樂普亦指出，「紅色禮物」上仗墨爾本盃後，休息已足夠，現時充滿新鮮感，狀態良佳，而每當佢處於咁嘅狀況時，通常會跑得很好。
其實今仗香港瓶「紅色禮物」對夏佳理而言，有另一重意義，隻馬之前已攞到獎金5,790萬，而今場頭馬獎金達940萬，即係話如「紅色禮物」如勝出，累積獎金將超過6,000萬，夏佳理剛周三晚贏五班馬「紅運飛駒」，只係小菜一碟，贏香港瓶先至係最佳聖誕前禮物！