前曼聯球星、人稱奧脫福大帝的簡東拿（Eric Cantona），前晚以品牌大使身份出席Hautlence腕錶於上環舉行的世界巡迴展覽開幕酒會，馬國明（馬明）、黃婉曼、Cara G.及其老公等均有出席。簡東拿雖未有接受訪問，但仍表現親切地跟傳媒揮手，並全程成為嘉賓集郵對象。
親民成集郵目標
據悉簡東拿原來有幽閉恐懼症，害怕搭𨋢，今次他來港入住酒店也是住在一樓，方便步行上落。而前晚活動後他感到疲倦，工作人員於是帶他到中環the L.place 20樓的Ten Feet Tall按摩揼骨，但因為簡東拿害怕搭𨋢，工作人員惟有陪他撐上20樓，揼完後又再行20層樓離開，相當大運動量。其間簡東拿在街上被不少途人認出並上前集郵，簡東拿也表現親民一一答應。
此外，從小就喜歡紅魔鬼曼聯的馬明，前晚在活動中甫見到簡東拿，即興奮地上前與他握手合照，猶如小粉絲一般。馬明自言踢波成績不俗，曾是校隊成員，他說：「細個志願係做足球員，阿媽覺得搵唔到食，冇做到。呢排冇劇拍，所以成日踢波，七日踢足五日。」
問近日感情生活如何？馬明笑謂：「我好得閒，唔急，所以成日有時間踢波。」早前馬明跟寰宇小花徐佳琦約會斷正，問他是否怕再惹緋聞而不敢拍拖？馬明口快快說：「我個人驚麻煩。」難道指徐佳琦十分麻煩？馬明聞言即急急澄清說：「唔係唔係，唔好亂講，同佢出過街兩次，食過兩次飯，有其他人喺度，將呢個新聞煲大好麻煩。」若將來遇上合適對象會否主動出擊？他說：「梗係會出擊，我係男仔嘛，唔通叫女仔出擊咩。」
採訪、攝影：羅慧敏、陳杰
12月15號要記低
See See TVB．Bloody最威
http://hk.apple.nextmedia.com/tvbloody