贏到唔識停嘅皇家馬德里，喺上周五提早上演嘅西甲，繼續為捧場客派禮物，憑基斯坦奴朗拿度（C朗）尾段連入兩球，作客4:1大勝艾美利亞，累積20連勝，[-2]都照開「客勝」。除咗對球迷，C朗對隊友一樣咁好，豪派6,800歐元（約65,600港元）名錶做聖誕禮物，紀念今年皇馬奪得第10個歐聯冠軍。
斥過百萬紀念10奪歐聯
踢得皇馬，人工一定唔差，不過錢又邊有人嫌多，身邊仲有年薪達1,700萬歐元嘅富貴隊友C朗，就真係錦上添花。C朗準備咗一人一隻「B字頭」名錶做聖誕老人，雖然6萬幾港紙，唔係認真貴，但成個一隊成22人，都過百萬；而且錶底印上代表C朗嘅「CR7」，以及手錶擁有人個名外，仲印上「La De'cima」（第10），紀念皇馬今年奪取球會第10次歐聯冠軍；右閘艾比路亞就率先放佢戴住名錶同C朗嘅合照，同埋近影手錶相放上社交網站，仲留言「加油！馬德里。」
聖卡斯勇救關鍵12碼
C朗派禮物畀隊友，又點少得派畀球迷；為咗遷就皇馬出征世冠盃，皇馬作客艾美利亞嘅西甲聯賽就提早喺上周五舉行，呢場關乎皇馬連勝走勢嘅比賽，過程都幾𥧌迴路轉，雖然皇馬由艾斯高喺34分鐘先開紀錄，加里夫巴利完半場前建功，以2:1領先一度由華沙追平嘅艾軍。不過，下半場皇馬就有馬些路犯天條，好彩門將卡斯拿斯撲出華沙嘅施射，艾軍未能追平，最後9分鐘就俾C朗連入兩球，以1:4大敗。
呢場足智彩開到皇馬讓[-2]，買咗「客勝」嘅球迷，真係要多謝聖卡斯同C朗派呢份「禮物」。皇馬教練安察洛堤賽後講：「比賽真係唔容易，最終戰果唔代表比賽情況，我哋都要到尾段先可以控制戰局；卡斯拿斯撲出12碼真係好關鍵。」
皇馬由9月中起已經喺各項賽事連勝20場，距離巴西球會哥列迪巴連勝24場嘅世界紀錄仲爭4場，睇吓世冠盃作客去到北非摩洛哥，會唔會令銀河艦隊斷纜。
識睇，一定係睇足英台【英波Live】：
http://soccer.appledaily.com
http://bit.ly/engballlive