泛民議員噚日為真普選公民抗命被捕後，即被警方送往屯門、葵涌同埋觀塘警署拘留和落口供，被拘禁的泛民議員噚日分享各自「享受」嘅待遇，先發現原來差好遠，有人冇啖好食、有人可以好似《無間道》入面曾志偉咁，可以叫乜嘢食都得、仲好好招呼！
張超雄有最好「服務」
八方收集議員嘅意見，發覺觀塘警署「服務」最好，但立法會議員中，只有工黨張超雄一人被送到該署。據講服務好在室內拘留問話，唔使留喺警署停車場長期「食風」，飯餸亦有最多款式，有魚和茄子、粟米斑塊等飯盒，隔幾個鐘又有餅乾食，朝早更有麥記做早餐，令送去葵涌警署嘅黨友何 E E大嗌羨慕。
點解何 E E要羨慕呢？因為葵涌警署真係冇啖好食！喺葵涌警署嘅單仲偕同八方呻，佢話伙食認真麻麻，佢自己係太平紳士，早已見識過唔同監倉嘅「皇家飯」，但佢話警署提供嘅「芽菜火腿絲飯盒」，真係仲難食過監倉飯，結果單雞要做「花生友」，食黨友帶來嘅花生頂肚。而同樣困喺葵涌警署嘅肥佬黎，就索性叫屋企人送盒私房炒麵，同好友馬丁、余若薇同埋梁家傑分享。
不過最好伙食嘅警署，要數拘留周永康、李卓人、陳家洛嘅屯門警署，佢哋話有點心燒賣、雞粥食，後來義務律師團又送咗十幾個飯盒，多到食唔晒要由「住客」打包攞走。
李八方
mailto:[email protected]